Televizyon
Bann abone merit enn meyer servis
Bann dimounn ki ena TNT pena okenn mwayen pou konn programasyon bann senn dizital sof atraver internet lor sitweb MBC, me la osi pa finn met programasyon pou tou bann senn.
Nou remote control finn vinn koumadir enn konsol video game. Pe bizin res pez bouton pou sanz senn a sak fwa pou fer sir ki nou pa pe rat enn bon program lor lezot senn.
Ena fwa par flouk nou resi tom lor enn match andifere Premier League lor MBC Sports Channel, ousoi enn dokimanter byen interesan lor l’Ind lor MBC4 (Astha/DD Bharati), ousoi enn deba lor bann aktialite politik internasyonal lor MBC8 (France 24).
Enn lot problem ki ankor pli grav, tou dimounn ki ena lantenn pe bizin pey Rs 100, mem si zot pena dekoder TNT. Li enn linzistis parski zot tou pe pey parey, me pa zot tou ki pe kapav get parey.
Bann abone merit enn meyer servis sirtou ki li peyan. Pou premye problem, MBC bizin trouv enn fason pou ki tou dimounn kapav konn davans bann programasyon lor sak senn dizital, par exanp a’traver bann lagazet, bann radio MBC ek osi lor so sitweb.
Ek pou dezyem problem, pou met enn term sa linzistis ant bann seki ena dekoder ek seki pena dekoder, swa : a) bizin ena enn senn analog pou sak senn dizital pou ki tou dimounn ki pe peye kapav get parey, ouswa b) sak dimounn ki pe pey Rs 100 gagn enn dekoder.
Tahir Hussen Pirbhay
pibliye lor lemauricien lindi 22 septam 2008
