Re-Inkarnasyon Hitler

Prezidan Sarkozy dan enn evennman nasyon-ini le 8 desam, ti dir ki li inposib pou li ser lame ek asiz lor mem latab avek enn dimounn ki finn oze dir ki Israel bizin disparet lor map.

Byensir li pe fer referans lor Prezidan Iranyen, Mahmoud Ahmadinejad ki dan enn intervyou an septam avek Larry King lor CNN ti explike ki Israel pou disparet parey kouma aparteid dan Sid-Afrik, ek parey kouma linyon Sovyetik (ki personn pa ti krwar).

Richard Falk, enn anvwaye spesyal konsey bann drwa-imin nasyon-ini, finn konpar bann tretman Israel anver bann Palestinyen kouma bann atrosite Nazi ek pres nasyon-ini pou pran bann mezir neseser (ki zame finn arive).

Dapre Falk, 46% zanfan dan Gaza soufer anemi ek lezot konplikasyon kouma bann dezord mantal. “Plis ki 50 % bann zanfan dan Gaza anba laz douz-an pena okenn lanvi pou viv,” Richard Falk dir.

Prezidan Sarkozy pa finn reazir lor sa deklarasyon-la, kot Richard Falk konpar Israel kouma Lalmay Nazi. Ek li pa pe reazir parey kouma avek eksitasyon li ti sote, pile, kouma enn ginyol kan La-Risi ti atak Zorzi. Linn perdi laparol ek fyel pou komant lor bann bom israeli ki pe masakre bann fam, zanfan ek inosan dan Gaza.

Obama lot kote pe pas so letan met ti boul dan trou dan Hawai. Paret li pa apresye ki so vakans golf pe deranze par bann zournalist ki vinn demann li so komanter lor bann latak Israeli lor Gaza. Li dir ki ena enn sel prezidan a la fwa. Mo demann mwa si enn avyon ti aterir lor enn batiman dan lamerik, eski so reaksyon ti pou parey. Sinon sa enn “prezidan a la fwa la”, pa trouv so bout depi bann soulye irakyen ti atak li!

Kan amenn rol lapolis lemond ouswa prezidan lemond, avan bizin vinn enn sitwayen lemond ek leker-la bizin sansib pou tou dimounn, tou kominote ek tou kwin lemond. Sirtou kan Hitler inn re-inkarne dan bann dirizan Israel !

Tahir Hussen Pirbhay
tahir.pirbhay@gmail.com
31.12.2008

Bann Etranze Dan Zot Prop Pei

Plis ki 8 600 zelev finn fel dan CPE lor 26 694. Parmi bann rezilta dernye lane dan bann lekol primer o-nivo internasyonal, nou rezilta li byen mediok ek li enn laont pou nou pei.

Olye nou fer bann propozisyon kouma bann ti-zetwal pou motiv zelev ek bann zistwar kouler-kouler pou ogmant bann zelev zot konpreansyon (pe fer referans avek lartik Mamzel Mottee lindi 22 desam 2008 lor forum Le Mauricien), nou bizin al dan profonder sa problem-la pou konpran byen kifer bann zelev pe fel.

A nou get so rasinn.

Ena enn lexanp byen interesan pou explik sa problem-la. Ena enn koupl ki ti kit Moris byen lontan pou al travay dan Lafrans ek zot finn retourn Moris avek enn ti-zanfan. Laba dan Lafrans ti garson-la ti pe tir sink A, me letan li vinn Moris, sa fer anviron de’z'an, so rezilta dan bez. Li pas mari byen dan franse (so langaz maternel), me dan bann lezot size, ena li pase lor limit, ena gro gro F. Li pe mem koumans krwar li enn gopya ek lane prosenn li pou konpoz CPE.

Si ou get piti-la, li paret koumadir li pe pas dan siklonn karol. Sifone par presyon parantal, ek fristrasyon dan lekol.

Ki so problem piti-la ? Li pa enn zero. Li ti enn top dan Lafrans. Enn Star Student kouma bann Morisyen ena labitid zaze. So problem, se langaz. So paran finn met li dan lekol piblik kot, pou premye fwa, li pe bizin aprann Anngle, ek li pe bizin aprann tou bann lezot size dan sa nouvo langaz-la. Si ti inskrir li dan bann lekol kot montre tou bann size an franse, alor piti-la pa ti pou amenn bann rezilta parey. Lor sa pwin la zot tou bizin dakor.

Abe nou bann zelev, ki zot langaz manternel ek ki langaz tou zot size ete ? Kifer kan met mem lexanp devan zot, zot azir koumadir zako dan lamizik ? Eski bizin fer enn desin pou zot konpreansyon ? Pa bann ti zetwal ki pou vinn a zot sekour si nou pran sa bann propozisyon infantil-la an konsiderasyon.

Nou sistem ledikasyon fer bann zanfan Morisyen vinn bann etranze dan zot prop pei !

Bann pov piti, zot pe bizin sarye presyon aprann Anngle ek an-mem-tan, aprann tou bann size an Anngle. Ala kifer nou bann zelev lekol primer pe fel. Akoz nou pe persiste dan sa sime-la, bann zelev-la fini koumans met dan zot latet depi tipti (avek konplisite zot paran) ki zot bann latet-feb, bann gopya ek bann voryen. Ek sa li pou res blok zot tout long zot lavi.

Les zot grandi dan zot langaz, sa pou donn zot konfyans dan zot-mem ek motivasyon pou aprann plis. Apre Form 3, letan zot fini akerir sifizaman bann konesans dan bann langaz etranze, ki li Anngle, ki li Franse, lerla zot kapav aprann zot bann size dan ninport sa bann langaz-la. Swa zot al pou enn letid siperyer an Anngle, ouswa an Franse.

Esperon ki olye zot persiste lor zot bann konplex ek tir bann fos pretex kouma ” sa pou kreoliz nou Anngle ” ek bann lezot konnri ki nou finn deza lir (alor pa lapenn repete), zot esey konpran seki mo finn ekrir avek enn lespri ouver.

Enn Patriot Kreol Morisyen

Tahir Hussen Pirbhay

pibliye lor lemauricien Mardi 30 Desam 2008