Avortman : solisyon pou bann ki pa konn pran zot responsabilite

Dan Forum Le Mauricien 2 avril, Dr Crish Virahsawmy dir ki tou bann pei devlope inn legaliz avortman dan koumansman so lartik ek dernye pei ki ti fer li ti Portugal, ki konsidere kouma pei pli katolik dan Lerop.

Nou tou kone ki legliz pa kontrol leta ek avek larzan ero, li pa enn sekre ki sak gouvernman ek laplipar zot sitwayin dan Lerop pe rod fer tou pou resanble la norm pou ki lezot konsider zot kouma bann vre Eropeen. Alor li bet ki nou asosye sa desizyon la avek relizion !

Li plito enn konpromi politik. Insiste ki Portugal enn pei bien katolik, sa desizion-la prouv lekontrer ek li enn move lexanp. Si ou anvi kone ki Labib dir, alor ouver ek lir.

Si lor sak problem nou al pran lexanp lor bann pei ki Dr Crish Virahsawmy apel pei devlope, abe biento nou pou trouv lil Maurice ki deza nou pe santi li, pou re kolonize par bann etranze dan enn lot form. Pran depi nou langaz ziska nou fason panse, Morisien pe rod gob tou seki vinn depi louest avek enn fierte… krwar ki zot pe vinn pli sivilize !

Kouma li difisil pou enn ris gagn paradi. Parol ki nou trouve dan bann gospel Nouvo Testaman. Eski li pa enn repons pou bann dimounn ki ena mwayin pou komet ek kouver zot bann imoralite : pran avion ek pey bann klinik dan bann pei ki Dr Crish Virahsawmy apel devlope ki permet touy enn lavi ki dan zot vant ? Enn lavi ki kitfwa inn forme par trayizon dan maryaz ouswa enn adolesan ki pann kapav tini so eksitasyon ek so paran ki pann kapav donn enn bon ledikasyon relizye ek moral ?

Dokter, enn adolesan li bizin kone ki kan li ouver so lazam ek pa servi enn bon kapot, li riske tom ansint. Adolesan-la so paran bizin sirvey so piti bien pre ek kone ki so piti pe fer. Anplas legaliz avortman pou ki, par exanp, li kapav kontiy so letid ek pas so lexamin, li pa ti pou meyer ki konsiantiz sa bann zanfan-la depi lekol lor prevansyon, donn zot enn ledikasyon sexiel ek ki bann paran anfin pran zot responsabilite pli serye.

“To pa pou touye” tou relizion dir. Li vre ki li enn krim si nou beni bann solda pou al lager pou enn rezon kouma swaf pouvwar, swaf grander, swaf petrol ! Me li vre osi ki tou relizion permet bann sitwayin enn pei pou defann zot mem ek li vre osi ki laplipar bann relizion ki pli pratike dan lemond, ankouraz bann imin pou vinn bann bon patriot ek defann zot pei kont bann atak etranze.

Si bann pei ki ena plis mama selibater, droger, alkolik, divorse, ek lezot fleo ki ena tro boukou pou site, zot ki ou apel sivilize ek devlope, alor mo souete ki Moris res aryere !

Personelman, mo trouv avortman pli imoral ki swisid. Parski swisid ou pe pran ou lavi, me avortman, ou pe pran enn lavi ki pa pou ou !

Prezervatif li enn solisyon pou kontrol nesans.

Avortman li enn solisyon pou bann ki pa konn pran zot responsabilite.

Konesans vedir kone ki ou fer ek fer seki ou kone.

Travay lor prevansyon, pa lor ankourazman bann vis.

Tahir Hussen Pirbhay

piblie lor lemauricien 12.04.2007