Furborl Lokal pe sufer

Rezon prinsipal : Media pa interese !

Dimans gramatin, fodre monn aste enn zurnal pu ki monn kone ki dan lapre-midi ena final Republic Cub maskilin ek feminin dan Moris.

Media Morisyen uswa Media Angle ?

Li byen sagrinan ki, kan ena bann match lalig ek kup angle, ek bann match internasyonal, nu truv MBC, tu bann radio ek lapres prepar bann morisyen pu sa bann match’la ek met zot dan lanbyans. MBC par zur pas lanons bann match ki pu zue, ena fwa 3 zur avan, plizir fwa lor so trwa senn prinsipal. Parey pu bann radio ek anplis de sa, zot invit bann piblik sms ek telefone pu donn zot lopinyon ek kumsa, zot kre bann forem vertyel ki byen interesan, ek osi amizan. Lapres ena fwa zot fini kumans ekrir bann gran lartik 2 zur avan avek plin foto, poster, intervyu, ena fwa zot mem lor kuvertir lagazet ek magazinn.

MBC al ziska organiz bann program televize kot zot invit bann lantrener lekip lokal vinn komant lor bann match angle ek internasyonal. Enn pratik ki mo truv debil. Tu sa bann zestaz-la pu bann zafer ki pa konsern nu pei !

Neglizans Media

Pu bann match lokal, lapres ofer enn ti but lartik dan enn paz ek pu enn final lokal, kitfwa lamwatye paz. Par zur mo ekut anviron trwazertan radio me zame mo’nn tann lanons final Republic Cup ki li maskilin, ki li feminin. Zame nu tann bann nuvel konsernan futborl lokal sof dan informasyon aswar apre ki bann match finn zwe dan lapremidi. Pena bann nuvel kuma tel zwer inn al dan tel lekip, tel zwer inn blese, intervyu bann zwer ek lantrener ek osi bann fans.
Si bann Morisyen pa interese, pa zis par furborl lokal me tu bann spor lokal, ki li voleborl, basketborl, maskilin uswa feminin, li an gran parti akoz bann media ki pa pe fer zot devwar kuma bizin. Li zot devwar pu kre enn santiman Morisyanism dan tu so definisyon. Bizin donn spor lokal plis lespas dan lapres ek lor tele.

Pena kuvertir futborl feminin

Kifer MBC pas final Republic Cup maskilin andirek ek pa pas final Republic Cup feminin? Li dekurazan pu bann lekip feminin ki la MBC ek lezot media MONTRE kareman zot dezinteresman. Mem si zot bann novis, dan nu pei nu bizin tret zot kuma bann profesyonel sinon pa pu ena progre. Bizin donn zot mem latansyon ki bann lekip maskilin.
Bann lekip pa konn organiz bann fans

Pu termine, mo panse enn lot rezon ki byen inportan, bann lekip pena bann muvman aktif pu ban fans ki byen organize pu konsyantiz bann dimunn, sirtu dan zot landrwa vinn motiv bann zwer ki pe reprezant zot landrwa. Par exanp, zot kapav organiz bann transpor gratis (sponsor pa manke), fer bann pavyon, kol bann lafis, eksetera. Eski zot pa ti byen organize kan ti ena bann lekip ki ti pe reprezant zot KOMINOTE ?! Eski bann Morisyen zot byen organize par zot mem zis dan bann afrontman konimalist ki ti degize an futborl? Note ki sa lepok’la, bann media ti byen aktif ek interese par sa bann afrontman’la.

Spor Moris pe sufer parski media pa interese. Morisyen, avek zot lespri tuzur kolonize, interese avek bann Angle! “Mwa mo Liverpool, Mwa mo Manchester…” Inn gran tan pu sanze. Inn ler pu azir. Prefer tar ki zame!

pibliye lor Star le 20 Avril 2008