Lakrwaze

per ki to leker kase
to fer krwar to pa amure

ek rod fer mwa krwar
ki pa lamur mo pe resanti
me lanvi…

to jir lamur li pa jire
sinon kifer
mo maryaz inn kase

me les mo jir twa
mo gate,

Lamur : li lanvi nu leker
Lanvi : li lamur nu lekor

to res dan nwar ek lamante
ar premye garson ki pase

ki lavi pena sans
ek sa donn li sans
pu transforme
ek vinn enn labuzi
pu iliminn to lavi

to protez so laflam
avek pasyon
ziska lafreyer pran twa
ek to jir:

tu labuzi pu fini enn zur
prefer teny li
avan li teny par li
kifer bizen zwir lalimyer
si li zis pasazer

si omwen mo leker
ti an lasir…

tonn miz lor lamitie
monn miz lor lamur
nu finn perji nu zwe

to sime ek mo sime
ena enn sel lakrwaze
sel moman nu santiman parey
kan li abiy an dey

nu sime zwenn
zis pu separe

© Tahir Hussen Pirbhay
http://tahirpirbhay.blogspot.com
tahir.pirbhay@gmail.com

Ramadan Mubarak

Enn bon moi pou iliminasion nou leker

Ramadan li neviem moi dan kalandriye islamik. Islam servi kalandriye lalinn, seki vedir, sak moi koumans avek enn nouvo lalinn. Parski kalandriye lalinn li onz zour moins ki kalandriye solar, bann fet Islamik zot dat res sanze.

Roza (Karem) li enn parmi bann pilye Islamik ek dan moi ramadan bann mizilman gard karem tou lezour. Tou lezour bann mizilman lev boner pou fer “seri”, enn repa ki zot manze avan soley leve. Zot ni manze ni boir – mem pa delo – depi soley leve ziska soley al kouse. Apre ki soley al kouse, zot kas zot karem ek apel sa Iftar. Normalman Iftar fer avek tam ek bann boison ki dou pou donn lenerzi vit.

Dan Roza ena boukou benefis. Kan zot fin ek soif, bann mizilman rapel bann soufrans bann pov ek sa ankouraz zot pou fer plis lasarite. Roza li osi enn oportinite pou kontrol-nou-mem ek pirifye nou lekor ek lespri. Ek dan sa moi sakre-la, roza ed bann mizilman trouv lape ki vinn par devosion ek relasion amikal avek bann lezot kroiyan.

“Bann Soufi inn dir ki Ramadan li enn bon moi pou iliminasion nou leker. Enn dimounn ki obzerv Roza souvan li experians bann vizion dan sa moi-la. Namaz li pirifye nou laam ek Roza iliminn nou leker. Pirifikasion nou laam vedir ki nou gagn deliverans depi bann pasion ki insit lemal; ek iliminasion nou leker vedir ki bann laport vizion ena posibilite ouver pou ki nou kapav ‘retrouv’ Bondie.” (Mirza Ghulam Ahmad – Malfoozat Vol IV)

Dan enn kote, bann mizilman Sunni resit Quran par moyen bann lapriyer spesial ki apel Tarawih tou-le-soir apre Esha dan bann moske dan moi ramadan.

Dan lot kote, bann mizilman Shia zot pa fer Tarawih me zot fer lapriyer tar dan asoir couma tou le-soir dan bann lezot moi ki nou apel “Tahajjud”. Ek dan sa moi la zot esey resit Quran dan so totalite.

Ramadan Mubarak pou tou bann mizilman.

Tahir Pirbhay

piblie lor lemauricien 12.09.2007