Lakrwaze

per ki to leker kase
to fer krwar to pa amure

ek rod fer mwa krwar
ki pa lamur mo pe resanti
me lanvi…

to jir lamur li pa jire
sinon kifer
mo maryaz inn kase

me les mo jir twa
mo gate,

Lamur : li lanvi nu leker
Lanvi : li lamur nu lekor

to res dan nwar ek lamante
ar premye garson ki pase

ki lavi pena sans
ek sa donn li sans
pu transforme
ek vinn enn labuzi
pu iliminn to lavi

to protez so laflam
avek pasyon
ziska lafreyer pran twa
ek to jir:

tu labuzi pu fini enn zur
prefer teny li
avan li teny par li
kifer bizen zwir lalimyer
si li zis pasazer

si omwen mo leker
ti an lasir…

tonn miz lor lamitie
monn miz lor lamur
nu finn perji nu zwe

to sime ek mo sime
ena enn sel lakrwaze
sel moman nu santiman parey
kan li abiy an dey

nu sime zwenn
zis pu separe

© Tahir Hussen Pirbhay
http://tahirpirbhay.blogspot.com
tahir.pirbhay@gmail.com

“Lerer Prosper” : Pli gran laont dan listwar Moris

Komye dimunn konpran nu lim nasyonal ek apartir ki laz zot ariv konpran li?

Mo rapel byen, sa zur kot guvernman ti bril larzan lepep avek ekzazerasyon pu fer enn fet grandioz, mo ti demann mo ti`nyes sant lim nasyonal pu mwa.

Linn fer li san okenn fot, dan enn sel tre ek avek enn gran fyerte. Pa “fyerte nasyonal” me enn fyerte kuma dir li pe sant enn sante Britney Spears uswa enn lot spesimenn par ker.

Letan mo demann li “ki tonn konpran”, “ki sante la pe dir”, li lev so zepol, fer enn lizye du ek reponn “pa kone” – apre li kas enn riye (parski li santi li dekonserte). Li ena 7 an.

Samdi le 26 Avril, mo ti al fer enn letur dan enn kartye inpe retire pu pran inpe foto. Bann dimunn byen amikal, ek pann tarde pu met inpe dialog. Laba, langaz ki zot koze tu’lezur, li bojpuri morisyen. Monn santi enn fristrasyon, kumadir kikenn inn komet enn krim kont mwa, parski personn pann montre mwa koz enn langaz morisyen!

Bann abitan’la koz kreol byen mem si ena fwa nu truv enn ti ezitasyon lor aplikasyon enn de mo parski bojpuri li zot langaz maternel. Me seki inportan, zot konn koze ek zot konpran. Al demann bann’la sinifikasyon lim nasyonal, zenerasyon bann gran paran pa konpran enn ferfut, bann paran kapav tras trase, bann nuvo zenerasyon, lekol primer ek mem segonder, personn pa konpran li dan so totalite.

Ofet li parey dan lavil ek partu dan lil. Konsilte bann gran paran ek paran kinn viv lepok lindepandans, ena buku pa konn sinifikasyon’la.

Ek misye Jean-Georges Prosper dan enn zurnal le 22 mars 2008, dir ki “Tout le monde est libre de changer, s’ils n’ont rien de mieux à faire.” Ki pu fer, travay ki bann morisyen responsab ti bizin fer depi 1968, zordi nu ki pe bizin fer li.

Akoz lerer Prosper (lim nasyonal an angle), nu pe bizin lite ek konsyantiz bann dimunn lor linportans pu ena enn lim nasyonal MORISYEN ek pa dan langaz ki Prosper ti sant’li : KOLONYAL.

Laz ki unn arive respektab Prosper, u pena nanye pu fer sof defann seki fer u fos fyerte, samem seki fer nu pli gran laont dan listwar Moris depi so lindepandans.

Tahir Hussen Pirbhay
http://tahirpirbhay.blogspot.com
tahir.pirbhay@gmail.com

Pibliye lor lemauricien le 14 Me 2008

Lil Zokris

dan enn lemond parelel
enpe kuma nu mem
kot ena enn ta gran lagel
ki mank byen fyel

sitye dan losean Malsin
ena enn lil moji
enn karikatir depas vilin
ki apel lil Zokris

so pavyon ti kat kuler
kot sak ras senbolize par enn kuler
grena, mov, oranz ek gomon
grena diriz pei, gomon sufer

zom zokrisyen byen sovaz
fam zokrisyenn, seki vilin
ena ti lespri
seki zoli pena lespri

so premye minis
enn fann macarena
li ena enn zoli non
li apel Nene Ron

enn mari vagabon
ki pas so letan
depans zokrisyen so larzan
pu dekuver lemond

enn lagel alkolik
inkonpetan dan politik
enn portre lakras kuma sor pa
ki lepep apel “tiatia”

dan so bann rar jiskur
parski byen rar li dan lil
li pas so letan flat so papi
pu ki lepep blye zot move zur

zot pe geny plezir
apre sak parol
ki zot pe lir
eski zot dan enn delir?

si ena pu rakonte
zame pu fini…
me zistwar la li pa nuvo
pa’vre mo bann gran lespri?

© Tahir Hussen Pirbhay
pibliye lor Star le 20 Avril 2008